Nýsköpun
Nýsköpunarstoð Nýheima þekkingarseturs
Nýsköpun er ein fjögurra stoða Nýheima þekkingarseturs. Markmið setursins er að taka virkan þátt í mótun öflugs nýsköpunarumhverfis á Suðausturlandi, einkum með því að vera vettvangur skapandi samvinnu í nýsköpun á svæðinu og með samstarfi við helstu atvinnugreinar á Hornafirði, frumkvöðla af ýmsum toga og lista- og handverksfólk. Áhersla er lögð á að hvetja til frumkvöðla- og nýsköpunarstarfs með verkefnum, viðburðum, fræðslu og stuðningi við einstaklinga og atvinnulíf.
Verkefnastjórar þekkingarsetursins aðstoða umsækjendur við gerð umsókna í Uppbyggingarsjóð Suðurlands sem úthlutað er úr tvisvar á ári, bæði í nýsköpunar- og menningarverkefni.
Nýsköpunarnetið
Nýsköpunarnetið er samstarfsvettvangur Nýheima þekkingarseturs, Vöruhússins, Sveitarfélagsins Hornafjarðar SASS og Háskólafélags Suðurlands. Markmið netsins er að efla frumkvöðla- og nýsköpunarstarf í sveitarfélaginu og auka aðgengi íbúa að stoðkerfi nýsköpunar.
Á vettvangi nýsköpunarsetursins er unnið að samstarfi ólíkra stofnanna sem starfa að nýsköpun með það að markmiði að efla allt umhverfi nýsköpunar á svæðinu. Þá vinnur Nýsköpunarnetið að því að miðla upplýsingum um stuðning og fræðslu til frumkvöðla, styrkumsóknir, aðstöðu sem stendur til boða og fleiri þætti sem varða málefni nýsköpunar.
Einnig vinnur setrið að því að halda reglulega viðburði sem hafa það að markmiði að efla tengsl innan nýsköpunarsamfélagsins, miðla fræðslu og hlusta á og heyra þarfir þátttakenda.
Nýsköpunarstofnanir Nýheima
Stofnanir innan Nýheima hafa unnið að margvíslegum nýsköpunarverkefnum. Vöruhúsið er vettvangur skapandi greina á svæðinu í samvinnu Framhaldsskólans í Austur-Skaftafellssýslu, Sveitarfélagsins Hornafjarðar og frumkvöðla. Í Vöruhúsinu geta einstaklingar, stofnanir og fyrirtæki nýtt aðstöðuna, sótt sér þekkingu og treyst tengslanet sitt á sviði sköpunar.
Framhaldsskólinn hefur unnið að eflingu verk- og listnámsgreina, meðal annars í samstarfi við Vöruhúsið. Skólinn hefur einnig tekið þátt í verkefnum sem miða að því að auka veg frumkvöðlafræðslu.
Mikil nýsköpun hefur verið í ferðaþjónustu á Suðausturlandi og hefur Rannsóknasetur Háskóla Íslands á Hornafirði unnið náið með ferðaþjónustuaðilum á því sviði.
Kvísker - aðstaða fyrir frumkvöðla
Nýheimar Þekkingarsetur býður uppá aðstöðu fyrir frumkvöðla og rannsakendur sem hefur fengið nafnið Kvísker, með vísun í bæinn Kvísker í Öræfum og það merka fræðastarf sem unnið var þar.
Aðstaðan er staðsett á austurgangi Nýheima í samstarfi við Sveitafélagið Hornafjörð og er hugsuð sem vettvangur fyrir nýsköpun, rannsóknir og samvinnu þar sem einstaklingar geta unnið að þróun hugmynda, verkefna eða rannsókna í skapandi og faglegu umhverfi.
Í rýminu eru fjögur skrifborð, hvert búið skjá, lyklaborði og mús, og hentar aðstaðan bæði þeim sem starfa að nýsköpunarverkefnum og rannsóknum á vegum stofnana eða háskóla. Þá veita Nýheimar þekkingarsetur stuðning og ráðgjöf. Aðgang má fá með því að senda tölvupóst á nyheimar@nyheimar.is.
Fræðsluefni
Samantekt styrkja
Þekkir þú til hinna margvíslegu styrkja sem gætu nýst þér eða þínu verkefni? Hér er að finna yfirlit yfir fjölda styrkja sem eru í boði á Íslandi til dæmis fyrir rannsakendur, frumkvöðla, listafólk og félagasamtök.
Skapa.is
Skapa.is er nýsköpunargátt, upplýsingaveita og fræðsluvefur fyrir frumkvöðla og aðra aðila sem eru að stíga sín fyrstu skref í nýsköpunarumhverfinu. Nýsköpunargáttin er hugsuð sem stuðningur fyrir nýsköpunarumhverfið á Íslandi. Með kortlagningu stuðningsumhverfis nýsköpunar hér á landi er öllum helstu upplýsingum safnað á einn stað.
Mikilvægi nýsköpunar í sjávarútveg
Föstudagshádegi í Nýheimum 13. desember 2020, hélt Guðmundur H. Gunnarsson fyrirlestur um Mikilvægi nýsköpunar í sjávarútvegi á tímum fjórðu iðnbyltingarinnar.