Örnámskeið um óáþreifanlega menningararf

Home / FRÉTTIR / Örnámskeið um óáþreifanlega menningararf

Í gær fór fram áhugavert örnámskeið í Nýheimum, í samstarfi við Þekkingarnet Þingeyinga, um frumkvöðlastarf með óáþreifanlegan menningararf. Setrið, ásamt Þekkingarnetinu, auk sjö annarra stofnana frá sex löndum eru nú að leggja lokahönd á NICHE verkefnið sem hlaut Erasmus+ styrk árið 2020.

Á námskeiðinu, sem var streymt frá Húsavík, var fjallað um hvað er óáþreifanlegur menningararfur og hvernig hægt er að móta sýn og stefnumörkun í frumkvöðlastarfi með þennan arf. Að örnámskeiðinu loknu svöruðu þátttakendur könnun um námsefnið en niðurstöður hennar verða nýttar í lokahnikk verkefnisins kennsluefninu til bóta. Í haust, þegar allir samstarfsaðilar hafa prófað kennsluefnið og bætt samkvæmt ábendingum þátttakenda, verður allt efni námskeiðsins þýtt á íslensku og gert aðgengilegt á vef verkefnisins og á verkefnasíðu Nýheima.

Kennsluefnið var þróað sérstaklega fyrir þetta verkefni eftir að samstarfslöndin rannsökuðu stöðu óáþreifanlegs menningararfs og vinnu með hann í sínum löndum. Efnið er ætlað öllum þeim sem áhuga hafa á að vinna með óáþreifanlegan menningararf en getur einnig nýst öðrum frumkvöðlum.

Kennsluefninu er skipt í tíu kafla:

  1. Samskipti og þekkingarmiðlun
  2. Lykilatriði við verndun óáþreifanlegs menningararfs
  3. Þróun sýnar
  4. Að vinna með óáþreifanlegan menningararf
  5. Stafrænt læsi og gagnavernd
  6. Framkvæmd
  7. EntreComp ramminn fyrir óáþreifanlegan menningararf
  8. Fjármálafræðsla og stjórnendalæsi
  9. Samskipti og samstarf með stafræna miðlun
  10. Að deila þekkingu og jafningjanám

Á örnámskeiðinu var farið í kafla 3, þróun sýnar og kafla 4, að vinna með óáþreifanlegan menningararf.
Fimm þátttakenndur sátu námskeiðið í Nýheimum, ásamt starfsfólki setursins, en fleiri þátttakenndur tóku þátt í gegnum netið.
Við þökkum öllum þátttakenndum kærlega fyrir komuna.