Nejra Mesetovic, verkefnastjóri hjá Nýheimum Þekkingarsetri, tók þátt í EPALE Community Conference 2025 sem fram fór dagana 22.–23. október í Brussel. Ráðstefnan bar yfirskriftina “Passages – A journey through adult learning” og markaði 10 ára afmæli EPALE, evrópska samstarfsvettvangsins fyrir fullorðinsfræðslu.

Á ráðstefnunni komu saman fulltrúar frá fjölmörgum Evrópulöndum – EPALE sendiherrar, starfsmenn opinberra stofnana og fulltrúar félagasamtaka – til að ræða helstu strauma og áskoranir í fullorðinsfræðslu og símenntun í Evrópu. Dagskráin einkenndist af þremur meginþemum: grunnfærni sem undirstaða símenntunar, gervigreind og umbreyting námsumhverfisins, og þróun framtíðarfærni í ljósi breyttra samfélags- og atvinnuhátta.

Nejra tók þátt í vinnustofu sem fjallaði um gervigreind og námsumhverfi framtíðarinnar, þar sem rætt var um hvernig gervigreind getur bæði stutt og ógnað námi, og hvaða færni fullorðnir nemendur þurfa að þróa til að nýta tækni á ábyrgan og gagnlegan hátt. Umræðurnar snerust meðal annars um áskoranir fyrir nemendur, skort á þjálfun og mikilvægi gagnrýninnar hugsunar. Einnig var bent á að lönd innan Evrópu væru á mismunandi stað þegar kemur að fræðslu og þjálfun í notkun gervigreindar.

Það var áhugavert að sjá hversu ólík nálgun lönd hafa á notkun gervigreindar í menntun og hversu mikilvægt er að efla bæði tæknilæsi og gagnrýna hugsun. EPALE-ráðstefnan er einnig frábær vettvangur til að mynda tengsl og finna möguleika á samstarfi við aðrar stofnanir í Evrópu sem vinna að nýsköpun og þróun í fullorðinsfræðslu.

Þátttaka Nýheima í EPALE Community Conference styrkir enn frekar tengsl við evrópskt samstarfsnet á sviði símenntunar og eykur möguleika á alþjóðlegum verkefnum í framtíðinni.