Ársþing Samtaka sunnlenskra sveitarfélaga (SASS) fór fram dagana 23. og 24. október á Kirkjubæjarklaustri. Starfsmenn Nýheima þekkingarseturs tóku þátt í þinginu ásamt fulltrúum sveitarfélaga af öllu Suðurlandi.

Arna Ír Gunnarsdóttir, verkefnastjóri, kynnti starfsemi Farsældarráðs á Suðurlandi og Lína Björg Tryggvadóttir, ásamt teymi byggðaþróunarfulltrúa, fjallaði um Sóknaráætlun Suðurlands og hlutverk byggðaþróunarfulltrúa í þróun byggðarlaga. Sögulegur áfangi náðist á ársþinginu en öll 15 sveitarfélögin í landshlutanum ásamt öllum þjónustuveitendum sem vinna að málefnum barna á Suðurlandi undirrituðu samstarfsyfirlýsingu um stofnun Farsældarráðs Suðurlands. Þetta er í fyrsta sinn sem öll sveitarfélögin sameinast með þessum hætti um að setja velferð barna í forgang.

Arndís Soffía Sigurðardóttir og Grímur Hergeirsson ræddu helstu áskoranir og tækifæri á sviði löggæslumála. Að lokinni formlegri dagskrá á fimmtudeginum bauð Skaftárhreppur þinggestum til móttöku þar sem hin árlegu menningarverðlaun SASS voru afhent.
Harpa Elín Haraldsdóttir, forstöðukona Kötluseturs í Vík í Mýrdal, hlaut Menningarverðlaun Suðurlands 2025 fyrir ómetanlegt og óeigingjarnt framlag sitt til menningar og samfélags í Mýrdalshreppi.

Á föstudeginum fóru fram aðalfundir Heilbrigðiseftirlits Suðurlands bs. og Sorpstöðvar Suðurlands bs. Á fundi Sorpstöðvar Suðurlands kynnti Elísabet Björney Lárusdóttir umfang og kostnað úrgangsmála á svæðinu og Anton Kári Halldórsson, sveitarstjóri í Rangárþingi eystra, flutti erindi um aukin tækifæri í samstarfi sveitarfélaga á þessu sviði.

Starfsmenn Nýheima þekkingarseturs tóku þátt í umræðum og nýttu tækifærið til að efla tengsl við samstarfsaðila í landshlutanum á þinginu.