Starfsmenn Nýheima þekkingarseturs tóku þátt í Byggðaráðstefnunni 2025 sem haldin var í Skjólbrekku í Mývatnssveit þann 4. nóvember. Ráðstefnan bar yfirskriftina „Félagslegur fjölbreytileiki samfélaga – jafnvægi, áskoranir eða vannýtt sóknarfæri?“ og var vettvangur fjölbreyttrar umræðu um þróun byggða, inngildingu og samfélagslega þátttöku í íslenskum byggðum.

Á ráðstefnunni komu saman fræðafólk, fulltrúar landshlutasamtaka, Byggðastofnunar og sveitarfélaga til að fjalla um hvernig breytt lýðfræði, fjölbreytt samfélög og samfélagslegar breytingar hafa áhrif á framtíð byggðanna. Umfjöllunin sneri meðal annars að stöðu innflytjenda, jafnrétti, menntakerfi og því hvernig ungt fólk sér tækifæri til náms, atvinnu og búsetu á landsbyggðinni.

Kynning Nýheima: Ungt fólk, búsetuval og HeimaHöfn
Fyrir hönd Nýheima flutti Eyrún Fríða, verkefnastjóri HeimaHafnar, erindi þar sem hún kynnti HeimaHöfn – þróunarverkefni Nýheima þekkingarseturs og Sveitarfélagsins Hornafjarðar. Hún greindi frá rannsóknum setursins á  samfélagsupplifun og búsetuvali ungmenna í Hornafirði. Þar kom meðal annars fram hvernig viðhorf ungs fólks til samfélagsþátttöku, námstækifæra og framtíðar í heimabyggð hafa áhrif á ákvörðun þeirra um að vera, flytja eða snúa aftur heim.

Í erindinu fjallaði Eyrún einnig um hvernig HeimaHöfn byggir á markvissri vinnu með ungu fólki sem miðar að því að efla tengsl þess við samfélagið og varpa ljósi á tækifæri til náms og atvinnu. Kynningin vakti áhuga þátttakenda og skapaði líflegar umræður um hvernig svipuð nálgun gæti gagnast öðrum landsbyggðarsamfélögum.

Þátttaka á haustþingi landshlutasamtaka
Í kjölfar Byggðaráðstefnu tóku starfsmenn Nýheima þátt í haustþingi landshlutasamtakanna sem haldið var á sama stað. Þar komu saman fulltrúar landshlutasamtaka af landinu öllu og starfsfólk Byggðastofnunar til að fjalla um Grænbók um byggðamál, framtíðarsýn og lykilviðfangsefni í byggðaþróun.

Á þinginu var lögð áhersla á sameiginlega stefnumótun, samstarf þvert á landshluta og hvernig nýta megi innviði, mannauð og þróunarverkefni til að styrkja íslensk byggðarlög til framtíðar.

Sterkari tengsl
Dagar fulltrúa Nýheima á Mývatni voru bæði gagnlegir og hvetjandi. Fræðileg umræða, reynslusögur annarra landshluta og öflug tengslamyndun eru gott veganesti fyrir áframhaldandi vinnu.

Nýheimar munu nýta lærdóminn frá ráðstefnunni og haustþinginu við frekari uppbyggingu verkefna til að efla menntun, samfélagsþátttöku og framtíðartækifæri íbúa í Hornafirði og á landsbyggðinni allri.