Dagana 17.-18. apríl 2026 verður átjánda Ráðstefnan um íslenska þjóðfélagið haldin og að þessu sinni í Hornafirði, á vegum Nýheima þekkingarseturs. Yfirskrift ráðstefnunnar er Unga fólkið og framtíðin. Með unga fólkið og framtíðina sem útgangspunkt skapast tækifæri til að rýna samfélagið á fjölbreyttan og þverfaglegan hátt. 

Ráðstefnan er árviss viðburður sem fyrst var haldinn árið 2007. Nýheimar þekkingarsetur hefur einu sinni haldið ráðstefnuna áður, árið 2017. Eftirtekt vakti þá hversu vel Hornfirðingar sóttu ráðstefnuna en bæði erindi og málstofur eru öllum opin. Við hvetjum ykkur til að taka dagana frá! Ráðstefnan er kjörinn vettvangur fræðafólks til að kynna rannsóknir sínar og fyrir öll áhugasöm til að fá innsýn í fjölbreytt viðfangsefni á sviði hug- og félagsvísinda.  

Nú köllum við eftir ágripum erinda. Fræðafólk úr öllum greinum hug- og félagsvísinda er hvatt til að senda ágrip af erindum byggðum á eigin rannsóknum. Sérstaklega er óskað eftir erindum sem tengjast yfirskrift ráðstefnunnar með einhverjum hætti en viðfangsefni ráðstefnunnar munu að öðru leyti ráðast af því efni sem fyrirlesarar kjósa að fjalla um. Miðað er við 20 mínútuna erindi, ásamt rúmum tíma til umræðna. Ágrip af erindum (hámark 250 orð) skulu berast eigi síðar en 28. febrúar n.k. til Hugrúnar Hörpu Reynisdóttur (hugrunharpa@nyheimar.is).