Nýheimar þekkingarsetur er samstarfsvettvangur fjölbreyttra stofnana sem starfa á sviði menntunar, menningar, nýsköpunar og rannsókna á Suðausturlandi. Aðilar að setrinu eru Framhaldsskólinn í Austur-Skaftafellssýslu, Fræðsluskrifstofa Hornafjarðar, Háskólafélag Suðurlands, Matís, Menningarmiðstöð Hornafjarðar, Náttúrustofa Suðausturlands, Ríki Vatnajökuls, Samband sunnlenskra sveitarfélaga, Stofnun rannsóknasetra Háskóla Íslands, Vatnajökulsþjóðgarður og Vöruhúsið. Nýheimar þekkingarsetur sameinar þessar stofnanir undir einum hatti með það að markmiði að efla samvinnu og skapa öflugt þekkingarsamfélag á Suðausturlandi, stuðla að jákvæðri þróun landshlutans og auknum lífsgæðum íbúa.

Eitt helsta hlutverk Nýheima þekkingarseturs er að leiða og stýra samstarfsverkefnum aðildarstofnana. Starfsemin felur einnig í sér mótun og fjármögnun kjarnaverkefna sem eru unnin að frumkvæði setursins. Lögð er áhersla á verkefni sem styðja við samfélagsuppbyggingu og auka möguleika og lífsgæði á svæðinu. Þrátt fyrir að starfsemi setursins beinist fyrst og fremst að nærsamfélaginu hefur í auknum mæli verið leitað eftir samstarfi við svipuð þekkingarsamfélög annars staðar á landsbyggðinni og erlendis. Þátttaka í margvíslegum samstarfsverkefnum er því mikilvægur hluti af starfseminni. Nýheimar þekkingarsetur hefur einnig gert samstarfssamning við SASS um ráðgjöf á sviði atvinnuþróunar, nýsköpunar og menningar.

Nýheimar þekkingarsetur starfar samkvæmt samningi við háskóla-, iðnaðar-, og nýsköpunarráðuneytið (HVIN) og skipulagsskrá. Tekjur setursins koma frá opinberu framlagi ríkisins, samstarfssamningum og sjálfsaflafé. Hjá Nýheimum þekkingarsetri starfa Hugrún Harpa Reynisdóttir forstöðumaður, Eva Bjarnadóttir, Eyrún Fríða Árnadóttir og Nejra Mesetovic verkefnastjórar.