Það var sannarlega líf og fjör þegar nemendur FAS heimsóttu Skinney-Þinganes, stærsta fyrirtæki Hornafjarðar. Heimsóknin var liður í verkefninu HeimaHöfn.

HeimaHöfn er samstarfsverkefni Nýheima þekkingarseturs og Sveitarfélagsins Hornafjarðar sem miðar að því að kynna ungu fólki fjölbreytt tækifæri í heimabyggð. Skinney-Þinganes, með um 350 starfsmenn og leiðandi í hátæknivinnslu afurða, er tilvalinn vettvangur til að vekja athygli á möguleikum heima fyrir.

Í heimsókninni var nemendum skipt í tvo hópa. Annar hópurinn fræddist um sögu og framtíðarsýn fyrirtækisins auk þess að fá kynningu á helstu störfum og atvinnutækifærum. Hinn hópurinn skoðaði hátæknivinnslusalinn þar sem róbótar og sjálfvirkar vélar gegna veigamiklu hlutverki í framleiðslunni. Margt vakti athygli þátttakenda, ekki síst fjölbreytileiki starfa og hvernig tæknin hefur breytt vinnuferlum.

Til viðbótar við áhugaverða kynningu á starfsemi fyrirtækisins, sköpuðust spennandi umræður um kosti þess að búa í samfélagi eins og Hornafirði. Lögð var áhersla á mikilvægi þess að víkka sjóndeildarhringinn, kynnast öðrum svæðum og störfum en um leið að vera meðvituð um þá miklu möguleika sem heimabyggðin hefur upp á að bjóða. Sérlega ánægjulegt var að fylgjast með áhuga nemenda þegar þau veltu fyrir sér framtíðinni í heimabyggð.

Heimsóknin varpaði ljósi á mikilvægi þátttöku og tengsla við atvinnulífið. Við þökkum Skinney-Þinganesi innilega fyrir einstakar móttökur!