Nýr verkefnastjóri hjá Nýheimum þekkingarsetri

Sandra Björg Stefánsdóttir hefur verið ráðin til starfa hjá Nýheimum þekkingarsetri.

Bakgrunnur Söndru Bjargar er BA próf í ferðamálafræði og viðburðastjórnun frá Háskólanum á Hólum.

Þá hefur hún lokið meistaranámi í mannauðsstjórnun frá HÍ.

Sandra Björg er fædd og uppalin í Kópavogi en bjó á Höfn á árunum 2008-2013.

Þá starfaði hún hjá Rannsóknasetri Háskóla Íslands og Framhaldsskóla Austur-Skaftafellssýslu ásamt því að sinna ýmsum félagsstörfum.

Síðan þá hefur Sandra Björg starfað hjá Félagsstofnun Stúdenta og hvatadeild Iceland Travel í Reykjavík.

Sandra Björg er nú flutt aftur til Hafnar ásamt manni sínum og árs gamalli dóttur.