Mánudaginn 28. október hófust Vísindadagar í FAS, þar sem nemendur viku frá hefðbundnu námi og sneru sér að rannsóknarverkefnum sem styrkja tengsl þeirra við samfélagið. Verkefnið byggði á HeimaHöfn, samstarfsverkefni Nýheima þekkingarseturs og Sveitarfélagsins Hornafjarðar, sem hefur verið í gangi frá upphafi skólaárs. Verkefnið felur í sér náið samstarf við ungt fólk, fulltrúa úr atvinnulífinu, skóla og aðra lykilaðila á svæðinu.

Á vísindadögum fengu nemendur tækifæri til að kynnast starfsemi stofnana Nýheima og ýmissa starfsstöðva innan ráðhússins, ásamt sýslumanni. Í litlum hópum könnuðu nemendur dagleg störf þessara stofnana, menntun starfsfólksins og mikilvægi starfa þeirra fyrir samfélagið í heild. Verkefnið var þverfaglegt og byggir á STEAM-nálguninni, sem sameinar greinar á sviði vísinda, tækni, verkfræði, stærðfræði og lista með einu markmiði: að veita nemendum víðsýna þekkingu og innsýn í framtíðarmöguleika þeirra til atvinnu í Sveitarfélaginu Hornafirði.

Nemendahóparnir öfluðu sér heimilda um sín viðfangsefni, heimsóttu starfsstöðvar til að safna frekari upplýsingum og taka viðtöl við starfsfólk. Þau fengu þannig beina innsýn í sérhæfð störf háskólamenntaðra í samfélaginu, áður en þau tóku til við að búa til stutt myndband um upplifun sína og niðurstöður.