Nýheimar Þekkingarsetur tekur þátt í verkefninu NICHE – Nurturing Intangible Cultural Heritage for Entrepreneurship sem á íslensku mætti þýða sem Frumkvöðlastarf um óáþreifanlegan menningararf. Verkefnið er styrkt af Erasmus+, samstarfsáætlun Evrópusambandsins.
Verkefnið miðar að því að efla frumkvöðlastarf í menningargeiranum með því að leggja aukna áherslu á óáþreifanlegan menningararf og þróa nýstárlegar aðferðir í kennslu og þjálfun um efnið. Markhópurinn er núverandi og tilvonandi fagfólk í greininni og er ætlunin að auka samkeppnishæfni og viðhalda vexti hennar.
Óáþreifanlegur menningararfur er í raun mikilvægari fyrir lönd Evrópu en bílaiðnaðurinn í heild sinni. Yfir 300.000 störf í Evrópu má tengja beint við óáþreifanlegan menningararf og tæplega 8 milljónir starfa má tengja óbeint við geirann (t.d. ferðaþjónusta). Fyrir hvert beint starf tengt óáþreifanlegum menningararfi skapast 26.7 óbein störf. Til samanburðar skapast einungis um 6,3 óbein störf fyrir hvert beint starf í bílaiðnaðinum.
Verkefnin sem unnin verða innan NICHE eru því t.d. að:
- Skilgreina hvað óáþreifanlegur menningararfur felur í sér og hvaða eiginleikar og hæfni þurfa að vera til staðar hjá þeim sem starfa innan geirans. Þetta verður skoðað með tilliti til Evrópska hæfnirammans.
- Þróa námsefni um óáþreifanlegan menningararf sem byggir á nýstárlegum aðferðum. Umfjöllunarefnin verða t.d. stjórnun, fjáröflun og stafræn framsetning
- Búa til kennsluvef sem verður þungamiðjan í miðlun á kennsluefni verkefnisins en efninu er ætlað að auka við færni og hæfni starfsfólks innan geirans. Þannig verða einstaklingarnir samkeppnishæfari og geta svarað kröfum um öra þróun og vaxandi markað.
NICHE verkefnið er tveggja ára verkefni sem hófst í lok árs 2020 og lauk árið 2022. Þátttakendur í verkefninu voru níu talsins og koma frá sjö löndum Evrópu; Íslandi, Belgíu, Grikklandi, Írlandi, Ítalíu, Spáni og Svíþjóð. Sótt var um verkefnið á Íslandi og fara samstarfsaðilar Nýheima Þekkingarseturs, Þekkingarnet Þingeyinga á Húsavík með verkefnastjórn yfir verkefninu.
Verkefnastjóri NICHE fyrir hönd Nýheima Þekkingarseturs var Sandra Björg Stefánsdóttir
Heimasíða verkefnisins: NICHE (nicheproject.eu)
Gögn
- NICHE IO2 Executive Summary Final En (English)
- NICHE IO2 Executive Summary IslFinal (Íslenska)
- NICHE IO2 Consolidation Report Final Final
