Nýheimar Þekkingarsetur býður nú upp á nýja aðstöðu fyrir frumkvöðla og rannsakendur á austurgangi Nýheima í samstarfi við Sveitafélagið Hornafjörð. Aðstaðan er hugsuð sem vettvangur fyrir nýsköpun, rannsóknir og samvinnu þar sem einstaklingar geta unnið að þróun hugmynda, verkefna eða rannsókna í skapandi og faglegu umhverfi.

Í rýminu eru fjögur skrifborð, hvert búið skjá, lyklaborði og mús, og hentar aðstaðan bæði þeim sem starfa að nýsköpunarverkefnum og rannsóknum á vegum stofnana eða háskóla. Aðgang má fá með því að senda tölvupóst á nyheimar@nyheimar.is.

Notendur hafa aðgang að stuðningi og ráðgjöf frá starfsfólki þekkingarsetursins, auk þess sem þeir verða hluti af lifandi samfélagi Nýheima sem sameinar menntun, rannsóknir, nýsköpun og atvinnulíf undir einu þaki. Hér er tækifæri fyrir þá sem vilja efla eigin verkefni eða leggja sitt af mörkum til nýsköpunar og rannsókna í samfélaginu. Aðstaðan markar mikilvægt skref í áframhaldandi þróun Nýheima sem miðstöð þekkingar og samstarfs.